Cunggelik Rasa

 Ato Suharto

Cunggelik hate na lamunan
milang kalangkang kahayang
hariwang tresna ngaringkang ilang
Mun ilang tinangtu kuring ringrang sumoreang

 
Hariwang hate na sawangan
Mun ngababade anjeun bebende

Sadar kana waruga kuring ayeuna
Anjeun ngolemar lantaran teu sababad na rupa

 
Jungjunan nu jauh na lamunan
Anggang dina pangharepan
Sok inggis sulaya nyata
duriat singray ngajauhan

Layuna Kembang Katresna

Ato Suharto

Kembang katresna, ligar na rasa.
Mapaes hate nyengitan taman kasmaran
Kiwari layu dijojo halodo.
Daunna murag katiup angin katiga

Kembang asih, kiwari ngan tinggal akar
Endah nu mapaes hate geus teu kataren
Kiwari tinggal kalahkay ninggang kahayang
Janji saati peunggas renggas ku lantaran

Hate moal bisa dipepende
Dibebenjo ku ligarna nu denok
Rasa katresna kuring lain pupulasan
Clik putih clak herang

Kuring moal ngarasula
Najan anjeun geus teu suka
Percaya kanu Maha Kawasa
Lamun jodo pastina moal kamana

Merdeka?

Ato Suharto

Teuneung ludeung

Teu gedag ku pangawak badag

Teu gimir najan ngalawan bedil

Teu sieun narajang lawan nu mawa meriam

Harita...

Carita ngabedar lahirna kamerdekaan

Bobolokot getih nandonkeun nyawa

Toh pati demi Ibu Pertwi

Kiwari...

Carita merdeka ngawujud nyata

Kabebasan nyolempang 

Nepi lali urang kana temah wadi

Kiwari lain harita

Ayeuna beda jeung baheula

Baheula pejuang perang ngalawan deungeun

Ayeuna urang ribut ngalawan dulur 

Kiwari...

Naha enya merdeka geus karasa nyata?

Merdeka boga saha?

Urang saha jeung aya dimana?

Citresna Anjeun

Ato Suharto

Citresna nu kungsi nyimbeuh
Kulimis ngancik na ati
Lebah rasa nu rumasa
Dalingding hiliwir pinuh ka asih
Bagja harita teu diwengku ku ugeran

Kiwari marojengja rasa
Lantaran anjeun sulaya
Udar tina tali pasini
Nu kungsi ku urang diwakca
Pancaroba dunya ngeureut kageugeut

Citresna ngagulidag
Caah na rasa nu tunggara
Lini linci ngarungkadkeun pasini
Runtuh tangkal kahayang
Tinggal kalangkang nu gugupay

Citresna nu kungsi nyimbeuh
Kiwari ngan tinggal carita

Gupay Rasa

Ato Suharto

Rasa gugupay ngajak nganjang

Unggah ka mangsa katukang

Dina mangsa ligar anjeun nu nyambuang

Seungit ngarambat hate

Minuhan rasa nu teu kagambar endahna

Harita...

Nyanggreutna kadeudeuh

Ngabeungkeut meumeut kageugeut

Sawarga dunya marengan sagara ktresna

Nu lamapar ku urang disorang

Harita...

Angin kasono ngadodoho moro

Sanajan munggaran urang pasini

Kembang katresna ligarkeun kahayang

Urang ngojay dina sagara larangan

Carita harita...

Kiwari ngan ukur gupay

Teu wasa kuring datang

Lengkah teu kuat obah

Lantaran ligarna kembang geus hambar

Kasono hamo bisa ngadodoho

Guntur kanyatan 

Ngarungkadkeun hakekat kodrat

Gupay rasa

Neuteup seukeut kageugeut

Nu can tangtu bisa deui euntreup

Anjeun Nu Linci

Ato Suharto

Ajeun nu kiwari linci
Lir campaka nu tinggal tangkalna
Sumeblak rasa mun inget kana kembangna
Kasono malibir dina pipireun pikir
mapay ngambah sagara citresna

duriat kokojayan lantis nyanding ngajomantara
Rek nepi kamana carita urang ngumbara
Sarebu usum geus jauh kalarung
ngaran anjeun teu lipur-lipur

Nepakeun kamelang kari waasna.
Anjeun kadeudeuh teu reureuh,
meuweuh dina ati geus maneuh

Anjeun,nu karasa sanajan hese rek nyata
Anjeun ninggalkeun sagara impian

Pileuleuyan Bapa

Ato Suharto

Bapa...

Anjeun lir mega

Nu mayungan dina panasna srangenge

Na wanci bentrangna beurang

Kanyaah anjeun niisan hate

Mepende rasa dina panenjo dunya

Bapa….

Moal laas sanajan katiga panjang

Moal luntur najan hujan mindeng ngaguyur

Kamulyaan cinta anjeun

Bakal ngakar ngawujud tangkal

Jadi buah kabagjaan kulawarga salawasna

Bapa….

Sabar anjeun dina nyiar pakeun

Kiwari geus ngawujud bukti

Runtut sauyunan kulawarga ka wangun

Nepi kapupusten anjeun nu tos dipundut kunu Rahayu

Bapa......

Pileuleuyan

Amal soleh tur kaikhlasan anjeun di dunya

Obor nu nyaangan Bapa di alam kubur

Amin....

Pileuleuyan Bapa....